Restaurant, dhaba, cafe — jo bhi ho, website par aane wala aadmi ek hi cheez soch raha hota hai: "khana kaisa hai, rate kya hai, aur khula hai ya nahi?"
Jitni jaldi ye teen jawab mil jaayein, utni jaldi wo phone uthayega. Baaki sab baad me.
Menu — ye sabse pehli cheez hai
Sabse zyada log menu ke liye aate hain. Aur sabse badi galti yahi hoti hai.
Printed menu ka photo mat lagao
Bahut dukaanein apna chhapa hua menu card ki photo kheech ke daal deti hain. Phone par wo padha hi nahi jaata — zoom karo to dhundhla, seedha dekho to chhota. Log dus second me chhod dete hain.
Menu likha hua text hona chahiye — dish ka naam, rate, saath me. Isse do fayde: padha jaata hai, aur Google use padh sakta hai. Photo wale menu me Google ko kuch nahi dikhta.
PDF bhi mat lagao
"Download menu" par koi click nahi karta. File download hogi, kholni padegi, wapas aana padega. Seedha page par dikhao.
Rate zaroor likho
Chhupane ka koi fayda nahi. Jise mehnga lagega wo waise bhi nahi aayega, aur jiska budget hai wo aaram se aa jaayega. Rate na dikhe to log doosri jagah dekh lete hain — itna simple hai.
Rate badalte rehte hain, isliye ek line daal do: "Rate badal sakte hain, confirm karne ke liye call kijiye." Bas.
Veg / Non-veg, aur Jain
Saaf nishan lagao. Hare aur laal dot se kaam ho jaata hai. Jain khana banate ho to alag likho — log dhoondhte hain aur nahi milta to poochte tak nahi.
Photo — asli, warna mat lagao
Internet se uthayi hui chamakti biryani ki photo har dusre restaurant ki site par lagi hai. Log pehchante hain. Aur jab aapka khana aata hai to fark saaf dikhta hai — ulta bura lagta hai.
Apne phone se, din ki roshni me, khidki ke paas plate rakh ke kheecho. Flash band. Thodi upar se. Bas itna kaafi hai, aur ye asli lagti hai.
- Apni 3–4 mashhoor dish — jo sabse zyada bikti hain
- Baithne ki jagah — saaf, khaali, roshni wali
- Bahar ka board — taaki aate waqt pehchan sakein
- Family ke liye jagah hai to wo bhi dikhao
Photo halki karwana zaroori hai. Phone se nikli photo 4–5 MB ki hoti hai. Aisi das photo lagaoge to page mobile data par khulega hi nahi. Ye kaam dikhta nahi isliye aksar chhoot jaata hai — banwane wale se poochh lo ki photo compress ki hai ya nahi.
Timing, aur bandh ka din
Khulne aur bandh hone ka waqt bade akshar me likho. Dopahar me break hota hai to wo bhi. Hafte me ek din bandh rehta hai to zaroor likho.
Ek aadmi bandh darwaze se wapas gaya to wo aapko phir se try nahi karega — aur kai baar Google par ek star bhi de jaata hai.
Order aur booking ka button
Page par sabse upar aur neeche dono jagah hona chahiye:
- Call karo — dabate hi number lag jaaye, copy karne ki zaroorat na pade
- WhatsApp — chat khule aur message pehle se likha ho, jaise "Order karna hai"
- Maps me kholo — ek tap me raasta shuru ho jaaye
Swiggy ya Zomato par ho to unke link bhi lagao. Aur ek baat seedhi hai — unke saath kaam karte raho, par apni website hamesha rakho. Unka commission lagta hai, unka listing unke haath me hai. Aapki site aapki hai.
Table booking ka form
Chhote restaurant ko iski zaroorat nahi hoti. Log call ya WhatsApp se hi book karte hain. Form lagaoge aur koi uthayega nahi to customer khada intezaar karta rah jaayega. Form tabhi lagao jab koi use rozana dekhne wala ho.
Ye cheezein mat lagwao
- Khulte hi bajne wala gaana. Log office me, bus me, ghar me phone kholte hain. Turant band kar dete hain.
- Poore screen ka video jo pehle chalta hai. Data khaata hai, waqt khaata hai, kaam kuch nahi karta.
- Ghumte hue bade slideshow. Menu neeche dhakel dete hain.
- "Welcome to our restaurant, we serve delicious food with love" — is line se kisi ko kuch pata nahi chalta. Uski jagah likho ki aap kis cheez ke liye jaane jaate ho.
- Banawati review. Asli review nahi hain to section hi mat rakho. Jhootha review pakda jaata hai.
Chhoti cheezein jo sach me kaam karti hain
- Parking hai ya nahi — likh do. Log sach me isse decide karte hain.
- AC hai ya nahi, family section hai ya nahi.
- Home delivery karte ho to kitne kilometre tak, aur charge lagta hai ya nahi.
- Party ya function ke liye jagah hai to alag likho — ye bade order laate hain.
- Payment — UPI, card, cash, kya chalta hai.
- Festival ka special menu — season me daalo, baad me hata do.
Site chaalu hone ke baad
Website ek baar bana kar chhod dene wali cheez nahi hai. Restaurant me sabse zyada badalne wali cheez rate hai, aur sabse purani padi hui cheez bhi wahi milti hai.
Mahine me ek baar dekh lo: rate sahi hain? Jo dish band kar di wo abhi bhi menu me to nahi? Timing badli to nahi? Nayi photo daalne layak kuch hai?
Das minute ka kaam hai. Jo restaurant ye karta rehta hai, uski site do saal baad bhi kaam ki lagti hai — aur jo nahi karta, uski site padhne wale ko lagta hai ki dukaan shayad bandh ho gayi.
Menu page kaise lagaya jaaye — kitchen wali samajh se
Maine paanch saal Chhatrapati Sambhajinagar me hotel line me kaam kiya hai, kitchen ke andar. Isliye menu ko main designer ki tarah nahi, kitchen ki tarah dekhta hoon. Do cheezein jo aksar galat hoti hain:
Menu ka order wo nahi hota jo menu card par hai
Chhapa hua menu card ek riwaaj se chalta hai — soup, starter, main course, roti, rice, sweet. Website par yahi order rakhoge to aapki sabse zyada bikne wali dish teesre scroll par chali jaayegi. Website par upar wahi rakho jo sach me sabse zyada bikta hai. Agar shaam ko sabse zyada biryani jaati hai to biryani sabse upar, bhale menu card me wo peeche ho.
Jo dish rozana nahi banti, usko menu me aage mat rakho
Har kitchen me kuch item aise hote hain jo sirf order par bante hain, ya jo shaam 8 ke baad khatam ho jaate hain. Website par wo aise dikhte hain jaise hamesha milte hon. Customer aata hai, wahi maangta hai, "nahi hai" sunta hai — aur pehla impression kharab ho jaata hai. Aise item par chhoti si line likh do: "sirf dopahar", "order par", "stock rehne tak". Ye ek line kai bahas bachati hai.
Rate galat rehna sabse mehnga nuksaan hai
Maal ka bhaav badalta hai to rate bhi badalte hain, ye normal baat hai. Par website par purana rate pada rehna normal nahi hai. Customer site par 180 dekh ke aaya aur bill me 210 aaya — usko ye nahi lagta ki rate badal gaye, usko lagta hai ki thag liya gaya. Isliye do me se ek cheez zaroori hai: ya to rate aap khud badal sako, ya banane wala usi din badal de. Banwane se pehle yahi poochh lo — "rate badalne me kitna time lagega aur kitna paisa?" Isi tarah ke sawaal hire karne se pehle wale article me hain.
Season aur festival — site isi waqt paisa kamati hai
Hotel line ka saal flat nahi hota. Ganpati, Navratri, Diwali, shaadi ka season, exam ke baad ki chhuttiyan — isi waqt bada order aata hai, party booking aati hai, aur log Google par dhoondhte hain.
Site aisi honi chahiye ki ek hissa das minute me badla ja sake — "Ganpati special thali", "party booking chaalu hai", "aaj raat 12 baje tak khula". Agar har banner ke liye banane wale ko message karna pade aur chaar din lagein, to doosre festival tak aap khud hi chhod doge. Ye ek cheez tay karti hai ki site saal bhar kaam karegi ya sirf bani rahegi.
Ek aur baat: festival ka banner baad me hatana bhi utna hi zaroori hai. Diwali ka offer February me chipka rehna site ko marri hui dikhata hai.
Aksar poochhe jaane wale sawaal
Zomato aur Swiggy par hain, to alag website ki kya zaroorat?
Un platform par aapki listing unke niyam ke hisaab se chalti hai, uspar commission lagta hai, aur customer ka number aapko nahi milta — wo unka customer rehta hai. Website apni hoti hai: commission nahi, seedha call aur WhatsApp aata hai, aur party booking jaise bade order aksar wahin se aate hain. Dono saath me rakho — delivery unse, aur apni pehchan apni site par.
Restaurant website ka kharcha kitna aata hai?
Ek page ki site, jisme menu, photo, call-WhatsApp button aur Maps ho, mere yahan ₹4,999 se shuru hoti hai aur teen din me ban jaati hai. Menu bada ho, gallery ho, Google Business Profile setup bhi chahiye to ₹9,999 wala package aata hai, hafta bhar ka kaam. Isme domain aur hosting ka saalana kharcha alag hai, karib ₹1,000–1,500. Poora hisaab Sambhajinagar ke dukaan waale article me likha hai.
Menu me rate likhna chahiye ya nahi?
Likhna chahiye. Rate chhupane se sirf itna hota hai ki log doosri site par chale jaate hain. Jise mehnga lagega wo waise bhi nahi aata. Saath me ek line daal do ki rate badal sakte hain, confirm karne ke liye call karein — isse aap bandhe bhi nahi rehte.
Online table booking ka system lagwana chahiye?
Chhote aur madhyam restaurant ko zaroorat nahi padti. Yahan log call ya WhatsApp par hi book karte hain, aur turant jawab chahte hain. Booking form tabhi lagao jab koi banda rozana usko dekhne wala ho. Bina dekhe form lagana customer ko chup-chaap intezaar karwane jaisa hai — usse behtar seedha WhatsApp button hai.
Website ke saath Google Business Profile bhi zaroori hai?
Haan, aur khaana-peena wale dhandhe me to profile hi sabse zyada naye customer laati hai, kyunki "restaurant near me" wahi se aata hai. Profile free hai. Pehle wo poori bharo — tarika is article me diya hai — aur usme apni website ka link laga do. Dono milke kaam karte hain: profile aadmi ko laati hai, site usko bharosa deti hai.
Photo professional photographer se karwani padegi?
Zaroori nahi. Phone se, din ki roshni me, khidki ke paas, flash band karke — itne me acchi photo aa jaati hai. Raat ki tube light me kheenchi photo peeli aur bejaan aati hai, wo mat lagao. Paanch acchi photo, tees average photo se behtar hain.
Sambhajinagar me ho aur poora kaam ek saath karwana ho to local page par rate aur process dono likhe hain.
Sudam Chavan
Main Chhatrapati Sambhajinagar se website banata hoon aur apne server par host karta hoon. Restaurant ke liye menu, photo aur Maps ka kaam saath me hi kar deta hoon.
Apna menu aur do-chaar photo bhej do — main bata dunga ki page par kaisa lagega.
WhatsApp par baat karo